في السجن – الطحين

الطحين؛ من المواد الغذائية الممنوعة عنا في السجن ولا زالت، ولكن كنا نحصل ع شي خاص بالمناسبات مثل العيد، وكعك العيد بالأساس كان يتجهز بالسميد، فنستفيد منه بأشياء ثانية.
كان نصيبنا بعد رمضان بكم كيلو وزعناها وكانت حصة كل أسيرة “أوقية” يعني ربع كيلو، بالمحصلة غرفتنا طلع لها كيلو 
هالكيلو بركة، عملنا فيه كيكة، شيشبرك، ومطبق مرتين 
لو استثنينا الكيكة لحجمها الصغير فالشيشبرك والمطبق عم خارج الغرفة كمان.
ريحة الزيت والسكر كانت كفيلة إنها تحملني ع البيت، الريحة نفسها، وشغل إمي. 
النكهة والريحة سواء الزيت أو التراب وحتى نسمة الهوا وأحيانًا أي صوت متل صوت صرصار الليل “النادر في المعتقل” ولو حلق طير من فوقنا أو وقف على الأطراف أو غرد ..
كلها كفيلة بأن تُحْييك وتحيي الأمل بقرب الحرية لأنه للحظة .. لحظة واحدة بتسافر عبر الزمن للأمام أو للخلف ثم تلتقط أنفاسك سعيدًا رغم إنه مجرد خاطر عابر!
ولأنه احنا بموسم المطبق والزيت بتذكر إنه كان آخر عهدي بمطبخ الزنزانة؛ إني عملت مطبق ليلة ترويحتي وانبسطنا