منوعات | 11.2018

عدد المشاهدات: 141

12.11.2019

اللهم ارحم اليتامى واربط على قلوبهم ودثرهم بأنسك وعطفك الخفي يا رحمن،
مَن فقدوا الأبوين خاصة أو فقدوا كل العائلة في كل بقاع الأرض.

عمومًا ولا حالة من (أشعر بـ) تمثلني، لأن مشاعري مختلطة بين الألم والحزن والسوء والإحباط والكآبة التي لا تخلو من محاولات غارق للتشبث بخشبة طافية!
إلى جانب تفاؤل خفي وطمأنينة لأن العاقبة للمتقين، مع شعور موازٍ بحزن لأني أدرك آلاف الآلام التي سنجدها في الطريق حتى ذلك الحين.

وإنا لله وإنا إليه راجعون وحسبنا الله ونعم الوكيل
يا رب ثبتنا


24.11.2019

في السجن كثير خطرت ببالي هذه كلمات هذه الأنشودة، وأحسست بها في كياني:
(لا بد بأنك زرت سجون
كي تعرف أن الموت حنون
سجن في شرق بلادي
سجن في غرب بلادي
سجن هي كل بلادي
سجن سجّان وعيون)

في مقطع آخر يقول:
(ما عدت أصدق أن بلادي في الأحياء
ما عدت أشك بأن القوم بدون حياة) (وأقول: بدون حياء)
مصداقًا لما يجري في التفاعل مع قضية الأسرى وعائلاتهم.

والله غالب على أمره ولكن أكثر الناس لا يعلمون


25.11.2019

بيوم كنت في حاجة إني أعرف أحداث صارت قبل سنين طويلة تاريخيًا، كنت أفكر الموضوع خيال، حتى وقعت على موقع رحلات فلسطينية (المسرد الزمني).
وهو موقع يبدأ من العهد العثماني (مع التحفظ ع كلمة احتلال)، مرتب في تصنيفاته وما يقدمه بالعربية والإنجليزية.
ينقصه شيء واحد هو أن يكون مفتوحًا للإضافة من قبل المطلعين ليصبح كبرامج المصادر المفتوحة مع الفارق ^_^.
الرابط في التعليق الأول، شو رأيكم تعملوا جولة وتعطوني رأيكم؟ 😇

وأتمنى يومًا الاطلاع على موقع يوثق التاريخ الإسلامي كاملًا بطريقة السرد الزمني، الإنفوجرافيك المتسلسل منذ شروق الفكرة الإسلامية.
وموقع آخر يوثق أحداث العالم في نفس اليوم في عدة بقاع، وهذه الفكرة كثير بتعنيني 🤩

إذا ما كنت قادر ع تحقيق فكرة، احكي عنها، أو احلم فيها 😀

أوقاتكم سعيدة ملأى بالخيرات 🌺

https://www.paljourneys.org/ar/timeline/overallchronology


26.11.2019

تناقض!
بقلك نقاوم بالتعليم وبعدين بعلق الدوام عشان مسيرة واحتجاج!
يعني بيعرف إنه الدوام ممكن يعيق المواجهة، وإنه التعليم مش مقــاومة، وإنه كل مشروع بده تفرغ ووقت.

تناقض!
بقلك الأسرى قضية وطنية، وبعدها بقطع راتب بعض الأسرى لأنهم مش من تنظيمه.
سبحان من جعل أسرى تنظيم معين إرهابيين وأسرى تنظيم ثاني مسالمين!

الي بتعمله السلطة إنها بتقدم قرابين للمجتمع الدولي، بعدين بتقلك المصالحة والانتخابات والهري الفاضي.

عمرهاش بتنتهي مشكلة البلد لأنه البوصلة بلا اتجاه.


27.11.2019

أما الصحيح “حرمنة”! 🤬
لما شركة جوال بتحسب الاتصال ع الأرقام المبدوءة بـ (1700) من خارج باقة اشتراكك! وهي غالبًا إما لجوال أو لأحد البنوك والمؤسسات كرقم خدمات!

ولما إنت بتفكر تحول من باقة للثانية بكون عليك تدفع 10 شيكل فرق! ليش يعني؟ شو هالسخافة؟ 🧐

ولما بسبب عطل عند شركة الاتصالات بتقعد 24 ساعة بدون نت وبعدين بتلاقي الفاتورة فش فيها تعويض يوم للزبون!!! 🤫

ولما إنت بتتصل ع الاتصالات أو شركة الإنترنت وبقعدوا دقيقتين دعايات ما بتهمك، بهمك يردوا عليك، وبالآخر الدعايات ووقت الانتظار محسوب عليك! أحا عنجد! 🤢

ولما إنت عميل عند بنك واتصالك عليهم عشان مشكلة بحسابك عندهم بكون كمان ع حسابك! 😒 بكسبوا ع ظهورنا!

ولما بتتواصل مع بنك بوقت الدوام وبردوش ولم تراسلهم ماسنجر بعملوا حالهم هبايل! 🤨

أحلى إشي بناقش موظفة ببنك عشان مشكلة، شوية بدها تطلع من التلفون، قلت لها أنا بحكيش ع المشكلة، بس لما أنا أطرق مشوار أعدل بيانات ع الفرع لازم حضرة الموظف يخبرني إنه اعمل تعديل ع كذا وكذا، مش شهر ولهلأ مش معدلين!

مش قد الخدمة تقدمهاش، وتحملنيش جميلة لأنه انت موجود عشان المواطن مش عشان سواد عيونك!

قال إيش بالآخر بقلك الزبون على حق! من أكذب ما قرأت وسمعت 🙃

احنا ع سكوتنا بندفع كمان تفكروش إنه السكوت مجانًا!!! 😬
بكفي تكدير، تراني مش معصبة بس بحبش ينضحك علي وأنسرق! -_-

سعيدة أوقاتكم 🌺
وكل عام وإنتو بخير خلص الشهر 😍
اللهم بلغنا رمضان <3 5 شهور


الأسيرة صابرين سالم من سخنين عانقت الحرية أمس بعد اعتقال لقرابة 3 سنوات.
😍 💐


29.11.2019

قربة مخرومة! 😵
في ناس بالبلد بدها الحياة ع كبسة زر لما هي تدعس عليه بدها إياه يزمر ويشجيها لتعرف ترقص!
لما بدها تحتج بتجيش المقمط في السرير، ولما بدها تطنش بتسكت سكوت المقابر!

بحكي عن فصائل المنظمة والحركات الاجتماعية الي بتقرر تصحى لما تحب تمارس دور وطني ع اعتبار إنه الوطنية هم بحددوا مقاساتها، ومقاسها بحتملش بالمرة التضامن مع الإسلاميين سواء اعتقال سياسي أو احتجاج ع قطع رواتب أو فصل تعسفي أو أي بلاء ثاني مختوم عليهم يحملوه ع قبورهم.

ليش يعني بنقطعش راتب محرري فتح وغيرهم مثلا إذا كانت الإشكالية إنه إرهابيين؟! 🤔

أما قصة الاعتراف باتفاقيات السلطة الي طالعين نازلين فيها فشو يعني؟
يعني الي بتاجر مع اليهود وببيع وبستورد وبصدر وVIP داخل طالع وممكن يشارك بمحافل بيظل وطني؟؟ 😡

انت وطني طول ما بتجيب مصاري لو من خمارة والا مخدرات والا تطبيع! 👎
وطني لو بتاخذ مصاري المهم شغال تحارب بعض الناس بالبلد انولدت هيك وانختم عليها أيديولوجيا معينة.
وبتبطل وطني لما بكون الك حق لازم تقبضه!

الأيديولوجيا بتصحى لما تتعلق بالدين وبتموت لما تتعلق بيسار مثلا؟ يعني الازدواجية هذه مقززة جدا. 😒
هو في حد بلا أيديولوجيا إلا الملحد؟
ع حساب حرية الرأي والمعتقد؟
والا هذه بنستخدمها لتبرير الكفر؟؟؟

ولما بتنخزهم المسلة ببلشوا يعربدوا وطبعا وسائل التواصل حذفت أغلب منصات المعارضة وبالتالي خلا لك الجو فبيضي واصفري!!!

ولعنة الله على الظالمين
قال وطن قال .. قال منظمة .. قال مظلة للشعب .. قال سلطة وهي حكم ديكتاتوري شللي !

وأعان الله كل مبتلى ومظلوم 🌷


30.11.2019

sms الشهر 🍀
(كمائن القلوب تظهر عند المحن)
ابن تيمية رحمه الله

 

التعاليق: 0

لن يتم نشر بريدك الالكتروني, الحقول المشار اليها بـ * مطلوبة.