خلف الكواليس! (إضراب بيرزيت 2020)
المضحك المبكي في إضراب جامعة بيرزيت لما أعلنت الدوام بعد 10 ليلًا، الي بحاولوا يخلقوا جسم تمثيلي لطلبة الماجستير، أول شي دعوا للالتزام بعدم الذهاب للجامعة عشان الإعلان متأخر، وبعد نص ساعة بعلنوا إنه المجلس بعلق الدوام ولكن كطلبة ماجستير إذا حضر الأستاذ في محاضرة! 
وقبل هيك خلال الإضراب كان في فريق بده تحييد الماجستير عن أي خلاف والدوام حسب البرنامج الأكاديمي، وبنفس الوقت الي بحاول يبني جسم منفصل دعا للالتزام بالإضراب، وطبعًا هذا الفريق استفاد من حالة الفوضى حتى يخلق نوع من الضغط لإيجاد جسم يمثل طلبة الماجستير!
فجأة بطلع لك حدا بنصب حاله مسؤول وبوجد جروب فيسبوك لحتى يشتغل على تحريض الطلبة لخلق جسم نقابي وطبعًا في حكي إنه في لقاء لكل الطلبة، وكمان مرة بيحكي باسم الكل! 
بتفهم إنه في ناس مدفوع لها رواتب تتفرغ وتشتغل في الجامعة، بتقبض من السلطة، من الحكومة، ولو بتقعد 20 سنة في الجامعة المهم يحققوا أهداف معينة!
لكن الإشكالية لما تكون الأهداف إنجاح مساعي تدجين جامعة بيرزيت وتحويلها إلى نسخة من جامعات أخرى، تعاني من ترهل في الحياة النقابية، وفساد، وأموال سياسية، وتحكم في مجريات الحياة الجامعية من جهات خارجية، والجهات الخارجية في الغالب صراعات لتنظيم معين وأقاليمه!!!
الي بدي أقوله .. طالب الماجستير الي علاقته بالجامعة محدودة في مساق ورسوم ورسالة أو بحث، وبساعات دوام محدودة، وعنده التزامات عائلية ومهنية، فايق ورايق ليشارك في جسم نقابي بمثله؟ هذا الفوقان والروقان لما يكون مدفوع له بيصير متوفر 
وبتفهم إشكاليات نقابة العاملين، وإشكاليات الحركة الطلابية (البكالوريوس المنتظمين)، ولكن إنه نفتح باب جديد عشان نكون وسيلة قبض لآخرين فهذا استغلال رخيص.
وبتمنى إنه طلبة الماجستير يركزوا ع دراستهم، ويخلقوا أسرة في الكلية نفسها وعلاقة ممتازة مع الهيئة الأكاديمية وينسوهم من الصراعات والعلاقات الندية والإجراءات الي رح توصلنا لمرحلة عند كل إشكالية؛ علق دوام، احتج، تعال، روح.
في أمور أهم في حياتنا!
