التنميط 😁
من الخطير لما تتعرف ع نموذج ويعجبك أو تتأثر فيه بمرحلة ما من حياتك ويعجبك نمطه في جوانب معينة؛ إنك تسقط هذا النموذج ع كل الي بشبهوه، ومن الحرج إلك ولتفكيرك ونفسيتك إنك تصنع له نمط معين فتوقع في التعميم أو الاختزال، وتحاول تقارب كل الناس لهالنموذج! 🤦♀️
لما بترسم صورة في ذهنك وعقلك الباطن عن نوع معين من الناس بتكون صدمتك كبيرة فيهم لما بكونوا أقل من نموذجك ولما بتشوف ممارساتهم المخالفة للصورة الأصل، ويبدأ تساقط عالم الأشخاص والقدوات في حياتك، مش لأنك مشغول بالحكم ع الناس.
الحكم ع الناس شي ظاهري مش هو المشكلة، المشكلة بالمرحلة الي سبقت الحكم، [ التنميط ]، إنك صنعت نموذج بعقلك وصرت تحاكم كل شي بناء عليه. (وأنا هيك 
)
مثلًا: 😥
مش يعني إنه توجهه الفكري وانتماؤه إسلامي إنه بدخنش!
ومش يعني هي متدينة يعني إنه بتسمعش أغاني! أو مالهاش ذوق بالفن والموضة!
(حتى لو هي معاصي)
ومش كل مسلم فاهم دينه وقايم بكل واجباته
ولا كل مسلمة هي نموذج كامل للالتزام والاحتشام
وووو تفاصيل كثيرة
المسلم ممكن يعصي ربه ويخالف تعاليم دينه ويدخن ويأرجل ويصيع ويتزعرن لكن ما بيكفر ولا بتعامل بالربا ولا بسرق ولا بزني.
الناس مش مسؤولة عن النمط الي إنت صنعته الهم كمثال ونموذج موجود بخيالك. 👍
مع إنه الإسلام كدين فيه جانب من النمط لكن النمط المقترن بالإبداع لأنه النمط والتكرار فيه وجوه إبداعية، فلما المسلمين كلهم بجمعهم غاية عبادة الله عزوجل والامتثال لأوامره، بصلوا بوقت واحد بطريقة وحدة، هذا نمط لكنه نمط مؤثر وخاشع وتدبره فيه جوانب كثيرة، لكنه تنميط محمود مش مرتبط بصور خيالية احنا بنحاول نقاربها بعقولنا. 🌞
مثلًا:
لما إنت كأب وأم بتحددوا الكتب في البيت من نوع معين أو شكل معين.
ولما إنتو بتمارسوا الحكم ع البشر قدام أطفالكم.
لما بتمارسوا النقد والتجريح ورسم المفروض والمحددات لأطفالكم
لما بشكل مباشر وغير مباشر بتحددوا مسار أطفالكم إنتو بتكونوا تصنعوا منهم نمط لشي موجود في مخيلتكم.
هذا تنميط محدد الآفاق وبصنع أشخاص بحملوا أسلوبكم في الحكم والتصنيف وتوليد تنميط جديد.
إنت عليك تفتح لهم آفاق لا محدودة في العلم والأدب، وتمارس التوجيه والنقاش وتعلمهم التفكير والتفكير النقدي، تعلمهم التحليل والفهم.
والا شو رأيكم؟ 
شو بدك تحكي إسراء؟ 🤔
1. في تنميط إيجابي وفي تاني سلبي.
2. ممكن في ناس هم مش نموذج كامل بالنسبة لعالمنا الخاص لكنهم كاملين في مجتمعهم ونموذجهم الي وجدوا فيه.
3. التربية ممكن تاخذ شكل النمط وهذا فيه خطورة لأنه ممكن يحدد الآفاق لذلك صناعة الحرية والتربية ع الحرية مش شي سهل لكنه مهم في ظل حسن التوجيه والإرشاد.
وأسعد الله أوقاتكم بكل خير 🌺
